Luangprabango, aŭ Luang-Prabango (laose: ຫຼວງພຣະບາ, laŭlitere: " Reĝa Budha Bildo), estas urbo situanta en centra Laoso, kie la rivero Namĥano renkontiĝas kun Mekongo proksimume 425 km norde de Vjentiano. Ĝi estas la ĉefurbo de la provinco Luangprabango. La nuna loĝantaro de la urbo estas proksimume 103,000 personoj.
La urbo estis antaŭe la ĉefurbo de la samnoma reĝlando. Ĝis la komunisma povotranspreno en 1975, ĝi estis la reĝa ĉefurbo kaj sidloko de la registaro de la Reĝlando Laoso. La urbo ankaŭ estas fama kiel Monda heredaĵo de Unesko.
La ĉefa parto de la urbo konsistas el kvar ĉefŝoseoj situantaj sur duoninsulo inter la rivero Namĥano kaj Mekongo. Luangprabango estas konata pro siaj multaj temploj kaj monaĥejoj. Ĉiumatene, centoj de monaĥoj piediras tra la stratoj kolektante almozon. Unu el la plej gravaj famaĵoj en la urbo estas granda kruta monteto sur kiu sidas Wat Chom Si.
