La Kastelo de Versailles (france Château de Versailles) estas grandega kastelo en antaŭurbo de Parizo, Versailles. Ĝin ekprojektis la reĝo Ludoviko la 13-a, kiu havis tie ĉasloĝejon, ĉirkaŭ 1627, konfidante siajn planojn al la arkitekto Jacques Lemercier, sed la efektiva kreado de la kastelo okazis sub Ludoviko la 14-a, post kiam ĉi tiu plenaĝiĝis en 1660. Li serĉis lokon proksiman al Parizo sed sufiĉe distance de ĝi por ke li povu regi la landon sen konstanta minaco de urbaj malordoj (kiujn li suferis infanaĝe dum la Frondo). Komence respondecis pri la konstruado la arkitekto Louis Le Vau ekde 1661, kaj ekde 1678 Jules Hardouin-Mansart. Ludoviko ekloĝis la kastelon en 1682, kaj la konstruadon oni pli-malpli finis ĝis 1688.
